गजल

ओइलिझर्ने फूलको कुरा नगरेकै जाती हुन्छ
दोहोरिने त्यो भूलको कुरा नगरेकै जाती हुन्छ

काकाकुलजस्तै भएर हिँड्दै छन् बटुवाहरू
सुकेर जाने मूलको कुरा नगरेकै जाती हुन्छ

बाढीहरू बढेका छन् चारैतिर बेहिसाबसँग
भत्किई जाने पुलको कुरा नगरेकै जाती हुन्छ

खोजिरहेछ समयले देश बोक्ने मान्छे अचेल
हुतिहारा ती हुलको कुरा नगरेकै जाती हुन्छ

आमाको लाज ढाक्न त चाहिन्छ सिङ्गै वस्त्र
टुक्राटुक्रा यी तुलको कुरा नगरेकै जाती हुन्छ

– घोराही, दाङ